दोन गोष्टी

स्वप्नं

पुस्तकाला पाय आले तर ते शाळेत गेलं. 

डब्यात त्याला गोष्टी दिल्या. ते दप्तराच्या बाहेर बसलं.

त्याला सगळे वाचायचे, हसायचे.

एकदा काय झालं?

कोणीच वाचलं नाही त्या पुस्तकाला!

मग काय झालं?

त्याचे हातपायच गेले.

त्याबरोबर मला जाग आली.

.......

वस्तू  आणि फळं

माणसं पुस्तकात गोष्टी लिहीतात.

माणसं पुस्तक बनवतात

आणि माणसंच वाचतात.

माणसं सीडी बनवतात.

माणसंच सीडी लावतात.

माणसंच सीडी पाहतात.

माणसंच आम्रखंड बनवतात.

माणसंच आम्रखंड खातात.

पण माणसं आंबा नाही बनवू शकत.

आंबा स्वत:च स्वत:ला बनवतो.

फक्त फळं स्वत:च स्वत:ला बनवू शकतात.

- सुह्रद

विषम पायांचा बेडूक

एक सात पायांचा बेडूक होता. म्हणून तो विषम पायांनी उड्या मारायचा. पण तो सात लोकांची शिकार करायचा तर एका कुत्र्याने त्याला पकडलं, खाऊन टाकलं. पण एक मांजर कुत्र्याला पकडायला आली , मांजरीने कुत्र्याला पकडलं मग बेडूक कुत्र्याच्या पोटातून बाहेर आला. मग त्याने रोज सात माणसांची शिकार केली मग कुठलाही माणूस राहिला नाही. मग कुत्रा मांजरीपेक्षा मोठा झाला मग कुत्र्याने बेडकाला खाल्लं, कुत्र्याने खाल्ल्यामुळे बेडकाचे पाय तुटले, बेडूक मरून गेला.  कुत्र्याने मांजरीला पकडलं , खाऊन टाकलं मग मांजर गेली मरून. कुत्र्याने स्वत:वर विश्वास बसवला. कुत्र्याने सगळ्या माणसांना सांगितलं, तुम्हांला त्रास देणारांना मी खाल्लंय, मग सगळी माणसं जिवंत झाली.
 मग सगळे सम पायांचे प्राणी आले.

-- सुहृद

मला काय करायला आवडतं? आणि काय करायला आवडत नाही?

मला मोठं व्हायला आवडत नाही. मला अभ्यास करायला आवडत नाही. मला "मिलियन डॉलर कॅट सीडी" पाहायला आवडते. मला झोपायला आवडतं. मला पाणी प्यायला आवडतं. मला द्राक्षं खायला आवडतात. मला उठायला आवडत नाही. मला संगमनेरला जायला आवडतं. पण मी जन्मलो होतो तेव्हा मला संगमनेरला जायला आवडायचं नाही. मला कर्‍हाडला जायला आवडत नाही. मला रॅपिडमधे चक्कर मारायला आवडते. मला "प्रत्येकाची रात्र थोडी आतून आतून वेडी" गाणं ऎकायला आवडतं. कालचा दिवस करता येत नाही, हे मला आवडत नाही. जादू करता येत नाही हे मला आवडत नाही. ऍक्सेस गाडीवर मागे आईला धरून बसायला मला आवडतं. मला यशचं मोठी शाळा पुस्तक आवडतं. मला चित्र पाहायला आवडतात. मला पुस्तक वाचायला आवडत नाही. मला ओठांना क्रीम लावायला आवडतं. हॉटेलमधे जायला मला आवडतं. मला आईसक्रीम खायला आवडतं.


 -- सुहृद